აშშ-ის საელჩო საქართველო

დღეს ელჩმა კელი დეგნანმა კომენტარი გააკეთა კიბერუსაფრთხოების ფორუმ 2020-ზე, რომელსაც ესწრებოდნენ საქართველოს მაღალი რანგის ოფიციალური პირები და სხვა დაინტერესებული მხარეები, რათა განეხილათ კიბერუსაფრთხოების მნიშვნელოვანი საკითხები და საქართველოს კიბერ საფრთხეებისგან უკეთ დაცვის გზები.

ელჩმა დეგნანმა ისაუბრა იმ გზებზე, რითაც ამერიკის შეერთებული შტატები ეხმარება საქართველოს გააძლიეროს მისი კიბერუსაფრთხოების შესაძლებლობები, რაშიც იგულისხმება ცენტრალური საარჩევნო კომისიის ახალი 1,9 მილიონი აშშ დოლარის ღირებულების კიბერუსაფრთხოების სერვის ცენტრის პროექტი და აშშ-ში დაფუძნებული ექსპერტების მიერ ჩატარებული ტრენინგები, რაც ხელს შეუწყობს საქართველოში კიბერუსაფრთხოების დარგში მოღვაწე პროფესიონალების ძლიერი მარაგის ჩამოყალიბებას.

ელჩმა დეგნანმა ხაზი გაუსვა, რომ საჭიროა მუდმივი ძალისხმევა საქართველოს კიბერუსაფრთხოების ეროვნული სტრატეგიის რატიფიცირებისა და კიბერ სფეროში როლებისა და პასუხისმგებლობების მკაფიოდ გადანაწილებისთვის.

შეერთებული შტატები გააგრძელებს მუშაობას საერთაშორისო დონორ ორგანიზაციებთან და მეგობრებთან ერთად, რათა დაეხმაროს საქართველოს კიბერუსაფრთხოების მიზნების მისაღწევად.

ელჩი კელი დეგნანის კომენტარი მედიასთან კიბერუსაფრთხოების ფორუმზე

კითხვა ღონისძიების შესახებ

აშშ-ის ელჩი, კელი დეგნანი: ძალიან მოხარული ვარ, რომ ეროვნული უსაფრთხოების საბჭოს მიერ გამართულ კიბერუსაფრთხოების ფორუმს დავესწარი. ვფიქრობ, თავად ის ფაქტი, რომ პრემიერ მინისტრი, მინისტრები და სხვა დაინტერესებული პირები ესწრებიან ამ ღონისძიებას, ნიშნავს, თუ როგორ სერიოზულად აღიქვამს ყველა საქართველოს კიბერუსაფრთხოების შესაძლებლობების გაძლიერებასა და გაუმჯობესებას. ამერიკის შეერთებული შტატები მჭიდროდ თანამშრომლობს და კვლავ გააგრძელებს საქართველოსთან თანამშრომლობას კიბერუსაფრთხოების შესაძლებლობების განვითარების კუთხით, რაც მოიცავს კიბერ სივრცის, კრიტიკული მნიშვნელობის მქონე ინფრასტრუქტურისა და ინფორმაციის უსაფრთხოების დაცვას. ვფიქრობ, რადგან ახლა საარჩევნო წელია, ინფორმაციის უსაფრთხოება ისეთი მნიშვნელოვანია, როგორც არასდროს, რათა ქართველი ამომრჩევლები დარწმუნებულები იყვნენ, რომ მათი ინფორმაცია დაცული იქნება. ამერიკის შეერთებული შტატები მოუწოდებს საქართველოს შემდგომი გადავადების გარეშე მიიღოს და დაამტკიცოს ყოვლისმომცველი ეროვნული კიბერუსაფრთხოების სტრატეგია და სამოქმედო გეგმა. ჩვენ, ასევე, მოვუწოდებთ საქართველოს, რომ მკაფიოდ განსაზღვროს ფუნქციები და პასუხისმგებლობები კიბერ სექტორში. ეს დაეხმარება საქართველოს უკეთ მოემზადოს, რათა გამორიცხოს და მაქსიმალურად შეამციროს სუსტი მხარეები და სწრაფად და ეფექტურად შეძლოს რეაგირება თავდასხმის შემთხვევებში. დარწმუნებული ვართ, რომ თავდასხმები მომავალშიც მოხდება, რადგან ეს ჩვენ ყველას შეგვეხო მთელ მსოფლიოში. მადლობა.