აშშ-ის საელჩო საქართველო

თოთხმეტი წლის წინ, ამ დღეს, რუსეთი შეიჭრა საქართველოს სუვერენული სახელმწიფოს ტერიტორიაზე. როგორც აქამდე, 2008 წლიდან მოყოლებული, დღესაც ჩვენ ვიხსენებთ რუსული ძალების მიერ მოკლულ და დაშავებულ ადამიანებს. ათწლეულების მანძილზე საქართველოს მოქალაქეებს აფხაზეთსა და სამხრეთ ოსეთში რუსეთის ოკუპაციის ქვეშ უწევთ ცხოვრება, ხოლო ათობით ათასი ადამიანი იძულებით გამოდევნილი და გაღარიბებულია. მათ სიცოცხლე და საარსებო წყარო წაართვეს.

მიმდინარე წელს, რუსეთის არაპროვოცირებული შემდგომი შეჭრა უკრაინაში ხაზს უსვამს საქართველოსა და უკრაინის ხალხის მიმართ სოლიდარობის საჭიროებას. ქართველმა ხალხმა ძალზედ კარგად იცის, თუ როგორ იწვევს რუსეთის აგრესიული ქმედებები, მათ შორის დეზინფორმაცია, ე. წ. „ბორდერიზაცია“ და მასობრივი იძულებითი გადაადგილება ენით აუწერელ გაჭირვებასა და ნგრევას.

რუსეთი პასუხისმგებელია იმ ვალდებულებებზე, რომლებიც მან 2008 წლის ცეცხლის შეწყვეტის შეთანხმების ფარგლებში აიღო: რუსეთმა უნდა გაიყვანოს თავისი ძალები კონფლიქტამდე არსებულ პოზიციებზე და დაუშვას შეუზღუდავი წვდომა ჰუმანიტარული დახმარების მიწოდებაზე. მან უნდა გააუქმოს საქართველოს აფხაზეთისა და სამხრეთ ოსეთის რეგიონების აღიარება. ეს აუცილებელია ასობით ათასი იძულებით გადაადგილებული პირისთვის, რათა მათ შეძლონ საკუთარ სახლებში უსაფრთხოდ და ღირსეულად დაბრუნება.

ჩვენი მხარდაჭერა ქართველი ხალხის მიმართ კვლავაც მტკიცეა, ესწრაფიან რა ისინი თავიანთი სუვერენიტეტისა და ტერიტორიული მთლიანობის დაცვასა და კონფლიქტის მშვიდობიან გადაწყვეტას.